6 mil kapin miapil sa Caravan sa Liberal Party sa Mandaue.

SUSAMA sa naglagiting nga init sa adlaw mainiton nga gihangop sa mga dumadapig ang mga lokal nga kandidato sa Liberal Party (LP) sa Team Mandaue sa caravan niadtong Sabado.

Wa damha sa partido ang gidaghanon sa mga tawo ug mga sakyanan nga nisalmot sa caravan nga nanukad sa Mandaue City Sports Complex diin ang rota nagsubay sa San Miguel via Hernan Cortes lahos a sa Subangdaku ngadto na sa M.C. Briones.

Moabot sa 12 ka kilometro ang gisubay sa caravan ug wa kalikayi nga nakamugna og kahuot sa dagan sa trapiko sa dihang nisubay kini sa mga major thoroughfare sa dakbayan.

Gibanabana nga moabot ngadto sa 6,000 ka tawo ug kapin sa 2,000 ka mga sakyanan ang nisalmot sigun sa pamahayag ni Ernie Manatad, executive secretary ni reelectionist Mayor Jonas Cortes.

Samtang usa ka senior citizen nga si Wilma Cabilao taga-barangay Alang-Alang ang gikataho nga nakuyapan gumikan sa tumang kainit ug gidala sa Mandaue City Hospital.

“Bisan way sakyanan mokuyog gyud, bahala maggukod sa sakyanan,” dason ni reelectionist Councilor Bethoven Andaya.

Gihulagway ni congressional aspirant Edmund Sanchez sa dihang pagtaak nila sa barangay Opao nga giingong Ouano country mainiton sila nga gidawat diin sa matag eskina dunay firecrackers nga gipamutang.

Sa sayo pa, si Opao barangay kapitan Jovita Ouano pormal nang nipadayag sa iyang suporta ngadto sa Team Mandau e human sa iyang pakigtagbo sa mayor niadtong miaging semana.

“Klaro na kaayo ang desisyon sa mga Mandauehanon,” matod pa ni Cortes gumikan sa gidaghanon sa mga tawo nga nihangop kanila apan gikinahanglan gihapon nila ‘overwhelming support’ atol sa piniliay. (FVQ)

Gipatik sa mantalaang Sun.Star Superbalita Cebu sa Abril 12, 2010